Ég fór reiður út af þessari mynd. Það hefur komið fyrir að mér sé sama um aðalpersónuna en þessi maður fór virkilega í taugarnar á mér. Í bæklingnum stóð að myndin væri full af dásamlegum atriðum en annað kom á daginn.Myndin fjallar um ónytjung sem hugsar ekki um annað en mat. Í byrjun sjáum við móður hans lemja hann með priki því hann nennir ekki að vinna. Hún sendir hann burt til að leita sér kvonfangs.
Fyrst kemur hann að þorpi þar sem allir þykjast vera sofandi vegna þess að það er eina leiðin til að komast hjá handtöku. Kúgunarstjórn landsins setur furðuleg lög og handtekur alla þá sem fara ekki eftir þeim. Maðurinn tekur þá til við að vekja allt þorpið vegna þess að hann er svangur. Hann fær að borða en svo koma svartstakkarnir og handtaka alla nema hann og stúlku sem flýr með honum.
Þau lenda í ýmiss konar klípum, m.a. að vera grafin lifandi (sjá mynd), en þá reynir hann að næla sér í epli frekar en að bjarga stúlkunni. Svona skilur hann eftir sig sviðna jörð hvar sem hann fer og ömurleikinn nær hámarki þegar hann sannfærir heilt þorp um að flýja ekki, heldur vera um kyrrt og berjast við svartstakkana. Þorpsbúar hafa yfir að ráða tréspjótum en svartstakkarnir aka um með byssur á mótorhjólum. Það fór eins og það fór.
Ég fann svo sannarlega ekki til samkenndar með eiginhagsmunaseggnum sem myndin fjallar um heldur var ég farinn að svartstakkarnir myndu handtaka hann svo að hann gerði ekkert fleira illt af sér. Hann færir ástandið sífellt úr öskunni í eldinn en slapp alltaf því hann hleypur svo hratt. Mér fannst myndin flott þangað til aðalpersónan opnaði munninn. Og talandi um að opna munninn þá glumdi í salnum þegar hann talaði í einu atriðinu, einnig voru "foley" hljóð hér og þar svo hátt stillt að þau voru óþægileg.
Þó hafði ég á tilfinningunni að þessi fáránlegu lög sem stjórnuðu hegðun þorpsbúanna væru ádeila á alræðisstjórnir en mér fannst hún heldur ónákvæm. Ég vissi ekki hvort það var átt við stjórnina í heimalandi leikstjórans eða Bandaríkjastjórn eða eitthvað annað. Einnig vil ég benda á það að ádeilan kemst ekki til skila ef fólk hættir að horfa vegna ógeðfelldrar aðalpersónu.
Að mínu mati er þetta pirrandi og langdregin mynd.
2 ummæli:
Hjartanlega sammála. Aðalpersónan er sett fram sem einhvers konar bjargvættur en gerir alltaf illt verra.
Ef ég ætlaði að missa mig í oftúlkun þá myndi ég segja að hann væri Bandaríkin, sem koma stórkarlaleg til bjargar ófrjálsu fólki hvarvetna, en flýja þegar á móti blæs.
Ég tók líka eftir þessum fáránlegu foley-hljóðum, og þau voru vægast sagt truflandi.
Umsögn um blogg
Vissulega ertu undanþeginn einkunn, en ég ætla samt að skella á þig einni umsögn.
Færslurnar eru fínar og margar skemmtilegar pælingar.
Bloggið er hluti af námskeiðinu, þ.a. ég myndi vilja að þú skrifaðir reglulega jafnvel þótt þú hafir enga gulrót í formi einkunnar. Það er bara oft ágætt að hripa niður vangaveltur um verkefni sem maður er að gera eða bíómynd sem maður var að sjá...
Skrifa ummæli